मधेस आन्दोलनबाट प्राप्त उपलब्धि जोगाऔँ–का.बा. अध्यक्ष श्रेष्ठ

सप्तरी, २२ असोज (रासस)
जनता समाजवादी पार्टी नेपालका कार्यवाहक अध्यक्ष राजेन्द्र श्रेष्ठले मुलुकमा मधेस आन्दोलनबाट प्राप्त परिवर्तन जोगाउनुपर्नेमा जोड दिनुभएको थियो ।
प्रेस मञ्च सप्तरीद्वारा आज राजविराजमा आयोजित पत्रकार सम्मेलनमा उहाँले परिवर्तनबाट संघीयता, धर्मनिरपेक्षता, समावेशिताजस्ता उपलब्धिलाई संस्थागत गर्न सबै सजग भएर लाग्नुपर्ने बताउनुभयो ।
मुलुकमा आएको परिवर्तन र उपलब्धिलाई जोगाउने जिम्मा मधेस प्रदेशकै हो भन्दै कार्यवाहक अध्यक्ष श्रेष्ठले लोकतन्त्र, समतामूलक समाज निर्माण गरेर अघि बढ्नुपर्ने बताउनुभयो । संघीयताकै आधारमा मधेसमा मधेस प्रदेशको पहिचान गराउन आफूहरु सफल भएको दाबी उहाँले गर्नुभयो ।
मधेसकै विद्रोहबाट संघीयता, धर्मनिरपेक्षता, पहिचानसहितको प्रदेश नामकरण गर्न सफल भएको भन्दै नेता श्रेष्ठले संघीय शासनलाई स्थापित गर्न जनता समाजवादी पार्टी लागिपरेको बताउनुभयो ।