Live From The Field

काठमाडौँ, १४ चैत्रः रिपोर्टर्स क्लब नेपालले यस वर्षको ‘मदन भण्डारी स्मृति पत्रकारिता पुरस्कार’ जनता टाइम्स डटकमका अध्यक्ष तथा प्रधान सम्पादक गणेशबहादुर बस्नेतलाई प्रदान गर्ने निर्णय गरेको छ ।
क्लबका संस्थापक सभापति ऋषि धमलाको सभापतित्वमा पुरस्कार छनोट समितिको आज बसेको बैठकले सो निर्णय गरेको हो । क्लब नेपालले हरेक वर्ष प्रदान गर्दै आएको सो पुरस्कार क्लबको यही चैत १७ गते राष्ट्रिय सभागृहमा आयोजना हुने २७औँ वार्षिकोत्सवका अवसरमा प्रदान गरिनेछ ।
पुरस्कारको राशि नगद रु एक लाख रहेको छ । बस्नेत विगत लामो समयदेखि पत्रकारिता क्षेत्रमा सक्रिय हुनुहुन्छ । पत्रकारितामा आफ्नो क्षमता र कुशलता प्रदर्शन गर्दै आउनुभएका बस्नेतले व्यावसायिक पत्रकारिताको संस्थागत विकास र प्रवद्र्धनमा महत्वपूर्ण भूमिका निर्वाह गर्दै आउनुभएको छ ।
प्रेस चौतारीको एक दशक लामो नेतृत्व गरिसक्नुभएका बस्नेतले २०५० सालबाट छलफल साप्ताहिकमार्फत पत्रकारिताको सुरुआत गर्नुभएको हो । बस्नेतले एक दर्जनभन्दा बढी साप्ताहिक पत्रिकामा कार्यकारी सम्पादकको भूमिका निर्वाह गर्नुभएको छ । पत्रकार बस्नेतले स्पेस टाइम्स दैनिकको समाचार सम्पादक, राजधानी दैनिकको कार्यकारी सम्पादक, सौर्य दैनिकको सम्पादक र च्यानल नेपाल टिभीको समाचार प्रमुखका रूपमा काम गरिसक्नुभएको छ । रासस