“फूड सिस्टम इनोभेसन च्यालेन्ज २०२४” प्रतियोगितामा नेपाललाई सफलता

गोदावरी, १९ असोज (रासस)
“फूड सिस्टम इनोभेसन च्यालेन्ज २०२४” प्रतियोगितामा नेपालका आशीर्वादराज झाले दोस्रो स्थान हासिल गर्नुभएको छ ।
नेदरल्याण्डमा सम्पन्न सो प्रतियोगितामा विश्वका विभिन्न नौ देशका १८ टोलीले प्रतिस्पर्धा गरेका थिए । प्रतियोगितामा झाले “समूह इकोग्रब” बाट भाग लिनुभएको थियो ।
काठमाडौँ फरेस्टी कलेजको स्नातक तहमा अध्ययनरत विद्यार्थी आशीर्वादले नेतृत्व गर्नुभएको उक्त समूहले प्रतियोगितामा दोस्रो स्थान हासिल गरेको उहाँका भाइ अभिनमले जानकारी दिनुभयो ।
“समूह इकोग्रब”का तर्फबाट आशीर्वादले आफ्नो परियोजनामा कालो सैनिक झिंगाको अनुसन्धानमा आधारित “इनोभेटिभ” समाधान प्रस्तुत गर्नुभएको थियो । यो अनुसन्धानले खाद्य प्रणालीमा टिकाउ र दिगो समाधान खोज्नमा सहयोग पुर्‍याउने विश्वास लिइएको छ ।
कालो सैनिक झिंगाको प्रयोगले फोहोर व्यवस्थापन र पोषक तत्व पुनः प्राप्त गर्न मद्दत गर्दछ । जसले वातावरणीय र कृषिसम्बन्धी समस्या समाधान गर्न महत्त्वपूर्ण योगदान दिने विश्वास लिइएको छ ।
यस प्रतियोगितामा हासिल गरेको सफलतापश्चात, “इकोग्रब” समूह युवा खाना फ्रयोगशाला कार्यक्रमको तयारीमा जुटेको छ । यो कार्यत्रम अक्टोबर २०२५ मा इटलीको रोममा आयोजना हुनेछ । जहाँ जित हासिल गरेका टोलीहरू आफ्नो परियोजनालाई थप विस्तार गर्न र कार्यान्वयन गर्न अवसर प्राप्त गर्नेछन् ।