भक्तपुर, २२ असार (रासस)
नेपाल कम्युनिष्ट पार्टी (एमाले)का अध्यक्ष एवं पूर्वप्रधानमन्त्री केपी शर्मा ओलीले आफ्नो निवास बालकोटमा सुरक्षा प्रमुख रहेका सशस्त्र प्रहरी बलका प्रहरी निरीक्षक ४२ वर्षीय उमेश थापाको निधनले निकै दुःखी र स्तब्ध बनाएको बताउनुभएको छ ।
ओलीले आज समवेदना सन्देश जारी गर्दै धेरै नबोल्ने र लजालु स्वभावका थापा काम एवं जिम्मेवारीमा जतिबेला पनि तम्तयार रहने गरेको स्मरण गर्दै थापाको निधनले निकै दुःखी बनाएको बताउनुभएको छ ।
ओलीले लेख्नुभएको छ, “सुरक्षामा खटिएका सशस्त्र प्रहरीका इन्स्पेक्टर भाइ उमेश थापाको निधनको खबरले दुःखी छु । आज म बाहिरका कुनै पनि कार्यक्रममा सहभागी भइनँ । हिजो साँझ छुट्टिएर आफ्नै घर गएका उमेश भाइको निधनको खबरले दुःखी बनायो । उनको परिवारजनमा समवेदना व्यक्त गर्दछु ।”
पूर्वमन्त्री एवं नेकपा (एमाले)का पोलिट्ब्यूरो सदस्य महेश बस्नेतले आफ्नै छिमेकी थापाको निधनले एक असल छिमेकी र गुण्डुले राम्रो युवा गुमाउनुपरेको भन्दै शोक व्यक्त गर्नुभएको छ ।
त्यस्तै बागमती प्रदेशसभा सदस्य किरण थापाले हिजोमात्रै उनीसँंगै बोलेर गएको तर आज मृत्युको खबरले दुःखी बनाएको भन्दै अकल्पनीय दुःखद् घटनाले मर्माहत बनाएको बताउनुभयो ।
थापाको पार्थिव शरीरलाई शिक्षण अस्पतालमा शव परीक्षणपछि आजै पशुपति आर्यघाटमा अन्तिम संस्कार गरिएको र पूर्वमन्त्री महेश बस्नेत, सशस्त्र प्रहरी बलका महानिरीक्षकलगायतले श्रद्धाञ्जलि अर्पण गर्नुभएको स्थानीय दिनेश थापाले जानकारी दिनुभयो ।
हिजो राति फुटबल म्याच हेर्दा अरुलाई डिस्टर्ब नहोस् भनी एक्लै सुत्न गएका उनी बिहान अचेत अवस्थामा भेटिएपछि भक्तपुर अस्पताल लगिएको थियो ।
