समाजवादी प्रेस संगठनबाट साहलाई कारवाही

सहारा संवाददाता–––––––––––––––
वीरगंज, १३ माघ ।
समाजवादी प्रेस संगठन नेपालका केन्द्रिय सल्लाहकार राघव साहलाई संगठनले कारवाही गरेको छ ।
संगठनको केन्द्रिय कार्यालयको शनिबारको निर्णय अनुसार साहलाई संगठनको साधारण सदस्यता समेत खारेज गरिएको संगठनका केन्द्रिय अध्यक्ष विश्वमणी सुवेदीले जानकारी दिनु भएको छ ।
अध्यक्ष सुवेदीले शनिबार एक प्रेस विज्ञप्ती जारी गरी संगठनको केन्द्रीय कार्यालयको शनिबारको निर्णय अनुसार पटक–पटक संगठनको हित विपरित भूमिका खेल्दै आएका संगठनका सल्लाहकार साहलाई आजैको मितिदेखि लागु हुने गरी यस संगठनको सम्पूर्ण जिम्मेवारीबाट मुक्त गरिएको जनाएका छन् ।
साथै उनको यस संगठनको साधारण सदस्यतासमेत खारेज भएको जानकारी गराएको विज्ञप्ती मार्फत जनाइएको छ ।
त्यसै गरी संगठनले नेपाल पत्रकार महासंघ पर्सा शाखाका सदस्य तथा यस संगठनका साधारण सदस्य अजय चौरसियालाई संगठनको हित विपरित भइरहेका गतिविधिबाट अलग हुन र संगठनका वैधानिक गतिविधिमा मात्रै संलग्न हुन सचेत गराएको छ । आफ्ना भूमिका र गतिविधिलाई नसच्याए अर्को कदम चालिने चेतावनी समेत दिएको छ ।
विज्ञप्ति मार्फत माघ १२ गते वीरगंज अलखिया मठ स्थित वृन्दावन होटलमा सम्पन्न दोश्रो अधिवेशनबाट शम्भु कुमार सुमनको नेतृत्वमा चयन १७ सदस्यीय कमिटिलाई वैधानिकता दिएको छ ।
विज्ञप्तिमा संगठनका केन्द्रीय अध्यक्षसहितका पदाधिकारी, पार्टी जिल्ला कमिटीका अध्यक्ष एवं प्रचार विभाग प्रमुख क.बालगोपाल थापा, पार्टीका वीरगंज महानगर कमिटीका अध्यक्ष क.मनोज चौधरीसहितको उपस्थितिमा सम्पन्न भएको अधिवेशनले शम्भु कुमार सुमनको अध्यक्षतामा १७ सदस्यीय जिल्ला कमिटी गठन गरेको छ ।
अधिवेशनमा संगठनको केन्द्रीय कार्यालयबाट स्वीकृत भएका सदस्यमध्ये दुई तिहाई र नयाँ सदस्यका रुपमा थप भएका १० जना पत्रकारको उपस्थिति थियो । नवनिर्वाचित जिल्ला कमिटीका पदाधिकारी तथा सदस्यको शपथ ग्रहण संगठनका केन्द्रीय अध्यक्ष विश्वमणि सुवेदीबाट सम्पन्न भएको विज्ञप्तीमा उल्लेख गरिएको छ ।
यसको साथै संगठनका नाममा गैरसांगठनिक गतिविधिमा संलग्न भएका केही व्यक्तिले विशेष जिल्ला अधिवेशन सम्पन्न भएलगत्तै अवैध तवरले अर्को जिल्ला सम्मेलनको आयोजना गरी त्यसका फोटो र ॅनिर्वाचित’ भएको भनी कार्यसमितिको नामावली सार्वजनिक गरेको कार्य स्वीकार्य नरहेको विज्ञप्ति मार्फत जानकारी गराइएको छ ।
अधिवेशन अघि संगठनका नाममा अवैध गतिविध गर्ने पक्षसंग स्थानीय पार्टी नेतृत्व, केन्द्रबाट तोकिएका संगठनका पदाधिकारीले बारम्बार संवादको माध्यमबाट समाधानको खोजी गर्ने प्रयत्न गर्दा पनि पार्टी र संगठनले बोलाएको समय र स्थानमा नआउने, काल्पनिक प्रकारका आरोप र समाधान सम्भव नहुने शर्तहरु अगाडि सार्ने काम गरेको हुंदा शम्भु कुमार सुमनको नेतृत्वमा निर्वाचित कमिटि बाहेक अन्य कमिटि वैधानिक नरहेको विज्ञप्ति मार्फत जनाएको छ ।
हाम्रो संगठनको अभ्यासअनुसार कुनै पनि भेला, अधिवेशन र कमिटी गठनका काम संगठनको प्रदेश, केन्द्रीय कमिटी र पार्टीको सम्बन्धित तहको प्रचार विभागसंगको समन्वयमा मात्रै हुने गर्दछ । अन्यथा त्यसविपरित भए, गरिएका कुनै पनि गतिविधि वैधानिक हुंदैनन् । होटल वृन्दावनमा सम्पन्न अधिवेशनबाहेक कुनै पनि नामका भेला, अधिवेशन र कमिटी यस संगठनलाई स्वीकार्य छैन विज्ञप्तिमा उल्लेख गरिएको छ ।
संगठनले विगतमा सदस्यता दिएको र पछि पत्रकारिता पेशामा संलग्न नभई अन्य पेशा र व्यवसाय गर्ने कारण सदस्यता खारेज गरिएका व्यक्तिहरुलाई विभिन्न पदमा निर्वाचित भएको भनी नाम सार्वजनिक गरिएको छ । समाजवादी प्रेस संगठन नेपाल पत्रकारिता गर्ने पत्रकारहरुको मात्रै संगठन भएको हुंदा फरक पेशा र व्यवसायका व्यक्तिहरु यस संगठनको साधारण सदस्य पनि रहन योग्य हुंदैनन् । त्यसमध्ये नेपाल पत्रकार महासंघको सदस्य बन्ने योग्यता नपुगेका र पत्रकारिता पेशामा संलग्न नरहेका कारण संगठनको सदस्यता खारेजीमा परिसकेका गैरपत्रकारहरुलाई विभिन्न पद बांडेर सार्वजनिक गरिएको कमिटी यस संगठनको नभएको पुनः स्पष्ट पारिन्छ । होटल वृन्दावनमा सम्पन्न अधिवेशनमा केन्द्रीय कार्यालयबाट स्वीकृत भएका सदस्यमध्ये दुई तिहाई सदस्यको उपस्थिति थियो । उक्त अधिवेशन मात्रै वैधानिक हो ।
यसरी समाजवादी प्रेस संगठन नेपालको आन्तरिक एकता, अनुशासन सहित संगठनका नीति र विधिका विरुद्ध पटक–पटक प्रश्नयोग्य भूमिका खेल्दै आएका यस संगठनका केन्द्रीय सल्लाहकार साह रहेको संगठनको ठहर छ । उनलाई संगठनको केन्द्रीय नेतृत्व र पार्टीको जिल्ला नेतृत्वले माघ ११ र १२ गते पटक–पटक सम्पर्कमा आउन र आफ्ना कुराहरु राख्न अनुरोध गर्दा पनि पार्टी र संगठनले बोलाएको स्थान र समयमा नआउने, बाहिर बाहिरै रहेर अन्य साथीहरुका सन्दर्भमा काल्पनिक आरोप लगाउने र अनुचित शर्तहरु राख्ने काममा सक्रिय रहेकोले संगठनका केन्द्रीय सल्लाहकार साहलाई आजैको मितिदेखि लागु हुने गरी यस संगठनको सम्पूर्ण जिम्मेवारीबाट मुक्त गरिएको विज्ञप्तिमा उल्लेख गरिएको छ ।