काठमाडौँ, २७ कात्तिक (रासस)
सूचनाको हकका लागि राष्ट्रिय महासंघले सूचना माग गरेकै कारण योजनाबद्ध रुपमा हत्या गरिएका कैलालीका सुरेश भुलको घटनाको यथार्थ छानबिन गरी दोषीमाथि कानुनी कारबाही गर्न माग गरेको छ ।
महासंघ जिल्ला कार्यसमिति कैलालीका सदस्यसमेत रहनुभएका भुलको कात्तिक २५ गते साँझ गौरीगंगा नगरपालिका–११ कान्तिपुर टोलस्थित आˆनै पसलमा बसिरहेका बेला एक समूहले कुटपिट गर्दा निधन भएको अध्यक्ष उमीद बागचन्द र महासचिव अजयकुमार साहले आज जारी गर्नुभएको विज्ञप्तिमा उल्लेख छ ।
यस घटनाले देशभरका सूचनाको हकका अभियानकर्मी र महासंघलाई स्तब्ध बनाएको विज्ञप्तिमा उल्लेख छ । महासंघ अध्यक्ष बागचन्द नेतृत्वको समूहले आजै गृहमन्त्री रमेश लेखकलाई भेट गरी घटनाको निष्पक्ष छानबिन गरी दोषीमाथि कानुनी कारबाहीको माग गरेको छ ।
कुटपिटबाट गम्भीर घाइते भएका भुलको धनगढीस्थित निसर्ग अस्पतालमा उपचारका क्रममा आइतबार निधन भएको कैलाली प्रहरीले जनाएको छ । घटनाको निष्पक्ष छानबिन गरी दोषीलाई कानुनबमोजिम कारबाही गर्न महासंघले जोडदार माग गरेको छ ।
Facebook Comments Box
