खानेपानीमन्त्री यादव र वनमन्त्री ठकुरीबिच योजना कार्यान्वयनमा सहकार्य गर्ने सहमति

सहारा संवाददाता–––––––––––––––
काठमाण्डौं, ०९ भदौ ।
खानेपानी मन्त्री प्रदीप यादव र वन तथा वातावरण मन्त्री ऐनबहादुर शाही ठकुरीबिच योजनाहरूलाई सरल र प्रभावकारी ढंगले कार्यान्वयन गर्न परस्पर सहयोग गर्ने विषयमा भद्र सहमति भएको छ ।
खानेपानी मन्त्रालयमा आइतवार भएको शिष्टाचार भेटमा दुवै मन्त्रीबिच सरकारले सञ्चालन गर्दै आएका योजनाहरूलाई सरल र प्रभावकारी ढंगले कार्यान्वयन गर्न सहयोग गर्ने विषयमा सहमति भएको हो ।
मन्त्रालयकी सहसचिव तथा प्रवक्ता मिना श्रेष्ठका अनुसार भेटका क्रममा मन्त्री यादवले शिवपुरी राष्ट्रिय निकुञ्जबाट बागमती नदीको पानी ल्याउने योजना कार्यान्वयनका लागि वन मन्त्रालयको सहयोग आवश्यक भएको जनाउदै सहजीकरणका लागी आग्रह गर्नु भयो ।
त्यसै गरी, मन्त्री यादवले सुर्खेतस्थित भेरी पम्पिङ परियोजनाको वातावरणीय प्रभाव मूल्याङ्कन (ईआइए) स्वीकृत गराउने प्रक्रिया छिटो सम्पन्न गर्न वन मन्त्री ठकुरीसंग आग्रह गर्नुभयो ।
सो अवसरमा वन मन्त्री ठकुरीले यसमा सहयोग पुर्‍याउन आवश्यक निर्देशन दिने प्रतिबद्धता जनाउदै खानेपानी मन्त्रालयलाई आवश्यक पर्ने सबै प्रकारका सहयोग उपलब्ध गराउने आश्वासन दिनुभयो ।
वन ऐन संशोधन गर्दा खानेपानी क्षेत्रलाई पहिलो प्राथमिकतामा राख्ने कुरामा पनि मन्त्री ठकुरीले जोड दिनुभएको थियो । भेटका क्रममा बुटवलमा निर्माणाधीन खानेपानी आयोजनाको जग्गा व्यवस्थापन लगायतका विषयमा पनि छलफल भएको प्रवक्ता श्रेष्ठले जानकारी दिइन् ।
भेटवार्तामा खानेपानी मन्त्रालयकी सचिव प्रमीलादेवी शाक्य बज्राचार्य, वन मन्त्रालयका सचिव डा. गोविन्दप्रसाद शर्मा, काठमाडौं उपत्यका खानेपानी लिमिटेडका प्रमुख कार्यकारी अधिकृत अशोक पौडेल, र खानेपानी तथा ढल व्यवस्थापन विभागका महानिर्देशक रामकुमार श्रेष्ठ, मन्त्री यादवका सल्लाहकार अवधेश कुमार दास लगायतका उच्च अधिकारीहरूको उपस्थिति थियो ।