spot_img
Homeदेशमधेशतीन पांग्रे सवारी व्यवस्थित गर्न वीरगंज महानगर सकृय

तीन पांग्रे सवारी व्यवस्थित गर्न वीरगंज महानगर सकृय

सहारा संवाददाता–––––––––––––––
वीरगंज, २० साउन ।
वीरगंज महानगरपालिकाले दर्ता नभई सञ्चालनमा रहेका तीन पांग्रे सवारीसाधन (रिक्सा, ई–रिक्सा, अटो रिक्सा) लाई कारबाही गर्न सुरु गरेको छ ।
महानगरमा दर्ता विना संचालनमा रहेका तीन पांग्रे सवारीका कारण ट्राफिक व्यवस्थापनमा कठिनाई हुने गरेकाले जथाभावी संचालन गर्न रोक्न कारबाही थालेको हो ।
जिल्ला ट्राफिक प्रहरी कार्यालयसंगको समन्वयमा महानगरको सडक तथा यातायात व्यवस्था शाखाको संयुक्त टोलीले २ दिनमा ४५ वटा तीन पांग्रे सवारीलाई कारबाही गरेको छ ।
मंगलबार र बिहीबार जांच गर्न खटिएको टोलीले महानगरमा दर्ता नरहेको, बाटो इजाजत (रुटपरमिट) नलिएको, लाइसेन्स, ब्लुबुक जस्ता महत्वपूर्ण कागजात बिना नै सवारी संचालन गरिरहेको भेटेपछि कारबाही गरिएको महानगरको सडक तथा यातायात व्यवस्था शाखाका प्रमुख इन्जिनियर विजय गुप्ताले जानकारी दिनुभयो ।
४५ वटा सवारीलाई पहिलो पटक भएकाले ५÷५ सय जरिबाना तिराएर अबदेखि प्रकृया पु¥याएर मात्रै महानगरमा संचालन गर्न पाउने गरि छाडिएको बताउदै उहाले फेरि दोहोरिए ५ हजासम्म जरिबाना गरिने र सवारी नियन्त्रणमा लिने पनि बताउनुभयो ।
महानगरका मेयर राजेशमान सिंहले महानगरमा दर्ता रहेकाले मात्रै महानगरमा सेवा दिन पाउने गरी व्यवस्था मिलाउन निर्देशन दिएसंगै तीन पांग्रे सवारी साधन जांचलाई तिब्रता दिइएको हो ।
महानगरबाहिर संचालन गर्ने भनेर यातायात कार्यालयमा दर्ता भएका तीन पांग्रेले पनि महानगरभित्रै आएर सेवा दिंदा ट्राफिक व्यवस्थापनमा चुनौति थपिएको छ ।
तीन पांग्रे सवारी साधन अव्यवस्थित रुपमा संचालनमा रहेकाले त्यसलाई व्यवस्थित बनाउन महानगरले अहिले दर्ता प्रकृया रोकेर पहिले दर्ता रहेकालाई व्यवस्थापन गर्न खोजेको इन्जिनियर गुप्ताले बताउनुभयो ।
नगरक्षेत्र भित्र अहिले २ हजार भन्दा बढी तीन पांग्रे (ई–रिक्सा, अटो रिक्सा) सवारी साधन अव्यवस्थित रुपमा संचालनमा रहेको अनुमान छ । महानगरमा ६ सय ७० वटा मात्रै दर्ता रहेर रुट इजाजत लिएका छन् ।
स्थानीय सरकार सञ्चालन ऐन, २०७४ ले आफ्नो क्षेत्र भित्रका सवारी तथा यातायात व्यवस्थापनको जिम्मा स्थानीय सरकारलाई दिएकाले महानगरले त्यही अनुरुप सवारी व्यवस्थापनका लागि कार्यविधि बनाएर काम गरिरहेको छ ।
यातायात व्यवसायी, ट्राफिक प्रहरी तथा सरोकारवालाहरुसंग बसेर छलफल गरिसकेको महानगरले त्यति गर्दा पनि व्यवस्थित हुन नसकेपछि अब भने कारबाही नै गर्न सुरु गरेको हो ।
महानगरपालिकामा सवारी दर्ता नगरी सञ्चालन गरेको खण्डमा सवारी चालकलाई प्रथम पटक १ हजार रुपैया जरिवाना तिरेर दर्ता गरेपछि मात्रै सवारी सञ्चालन गर्न पाउने व्यवस्था छ ।
जरिवाना नतिरेसम्म नगरभित्र सवारी सञ्चालनमा रोक लगाउन सकिने कार्यविधिमा स्पष्ट उल्लेख छ । तर पनि व्यवहारिक रुपमा तीन पांग्रे सवारीलाई कम जरिबाना गरिएको महानगरले जनाएको छ ।
त्यस्तै सवारी साधनले रुट इजाजत पत्र नलिइ सवारी चलाएको खण्डमा पहिलो पटक तत्कालै रु. १ हजार ५ सय जरिवाना र दोस्रा पटकका लागि रु. ३ हजार जरिवाना गरिने व्यवस्था छ ।
अब हरेक दिन नगरको विभिन्न स्थानमा ट्राफिक प्रहरी, नगर प्रहरी र महानगरको सडक तथा यातायात व्यवस्था शाखाको संयुक्त टोली तीन पांग्रे (ई–रिक्सा, अटो रिक्सा) सवारी साधन चेकजाँचका लागि खटिने जनाइएको छ ।

Facebook Comments Box
- Advertisment -
सम्बन्धित खबर
- Advertisment -

ताजा अपडेटस

- Advertisment -