नारायणी अस्पतालको स्थिति बारे मेसुलाई ध्यानाकर्षण पत्र

सहारा संवाददाता–––––––––––––––
वीरगंज, ०४ साउन ।
स्वतन्त्र मानव अधिकार समाज बीरगंजले नारायणी अस्पताल भित्र देखिएका विकृति विसंगतिको तत्काल अन्त्य गर्न माग गर्दै मेडिकल सुपरिटेन्डेन्टलाई ध्यानाकर्षण पत्र बुझाएको छ । समाजका सभापती कृष्ण कुमार खनालको नेतृत्वमा पुगेका टोलीले अस्पतालका मेडिकल सुपरिटेन्डेन्ट डा. चित्तरन्जन साहलाई नारायणी अस्पताल भित्र देखिएका विकृति विसंगतिको तत्काल अन्त्य गर्न माग गर्दै ध्यानाकर्षण पत्र बुझाएका हुन ।
नारायणी अस्पताल तराई मधेशका आर्थिक अवस्था कमजोर रहेको विपन्न वर्गका नागरिकको उपचारका लागि एक मात्र भरपर्दो माध्यमको रुपमा रहेको र यसलाई थप सशक्त र व्यवस्थित गर्दै लैजानु पर्ने अवस्थामा अस्पतालमा थप विकृति मौलाउदै जानु दुखद विषय भएको ध्यानाकर्षण पत्रमा उल्लेख छ ।
ध्यानाकर्षण पत्रमा नारायणी अस्पतालको सबै क्षेत्रमा विकृति बढदै गएको डाईलोसिस सेवा देखि हालै अस्पतालमा भित्र्याईएको ३० करोडको एमआरआई सेवा लगायतका सेवाहरुको लथालि· अवस्थामा रहेको अस्पतालको फार्मेसीले स्वास्थ्य बीमा गराएका व्यक्तिलाई बिक्री गर्ने औषधिमा ठगिरहेको सम्बन्धमा समाजको गम्भिर ध्यानाकर्षण भएको उल्लेख गरिएको छ । ध्यानाकर्षण पत्रमा नारायणी अस्पतालमा हुने गरेको लापरवाहीले सिमा नाघेको छ । यस्तो अवस्थामा दोषीलाई कारवाही गर्ने दायित्वबाट अस्पताल प्रशासन पन्छिनु दुःखदायी विषय भएको उल्लेख छ ।
समाजले ध्यानाकर्षण पत्रमा तत्काल अस्पतालमा लापरवाही गर्ने व्यक्तिहरुलाई कारवाही गर्न माग गरिएको छ । ध्यानाकर्षण पत्र बुझाउने टोलीमा समाजका सभापती खनालको नेतृत्वमा उपसभापति नन्दी किशोर यादव, महासचिव दिपक साह कानु, कोषाध्यक्ष उर्मिला कुशवाहा, केन्द्रिय सदस्यहरु बिक्की सिंह, सोनालाल प्रसाद गुप्ता, लालबाबु प्रसाद गुप्ता, निर्मला कुशवाहा लगायतको सहभागिता रहेको थियो । यसै विच समाजका सभापति खनालले यसै हप्ता बीरगंजको विद्युत प्राधिकरणमा पनि ज्ञापन पत्र बुझाउने कार्यक्रम रहेको उहाले बताउनु भयो ।