spot_img

आगामी आवको नीति, बजेट तथा कार्यक्रम तर्जुमाका लागि मेयर सिंहले सबै राजनीतिक दलका प्रतिनिधिबाट सुझाव



सहारा संवाददाता–––––––––––––––
वीरगंज, ०५ असार ।
वीरगंज महानगरपालिकाका मेयर राजेशमान सिंहले आगामी आर्थिक वर्ष २०८०÷८१ को नीति, बजेट तथा कार्यक्रमका लागि राजनीतिक दलहरुसंग सुझाव लिनु भएको छ ।
आगामी आवको नीति, बजेट तथा कार्यक्रम तर्जुमाका लागि मेयर सिंहले सबै राजनीतिक दलका प्रतिनिधिबाट सुझाव लिनु भएको हो ।
बुधबार नीति तथा कार्यक्रम र बजेट ल्याउने तयारी गरिरहेको महानगरले बजेटमा सबैको अपनत्व बनाउन यहा प्रतिनिधित्व गर्ने सबै राजनीतिक दलका प्रतिनिधिसंग सुझाब लिएको हो ।
वीरगंज बनाउन सबै लाग्नु पर्ने भएकाले बजेटमा सबैको सुझाव र सल्लाह समेट्न खोजिएको मेयर सिंहले बताउनुभयो ।
राजनीतिक दलका प्रतिनिधिहरुले सामाजिक विकास, आर्थिक विकास, पूर्वाधार विकास, वन वातावरण, सेवा प्रवाह र सुशासनका सवालमा आ–आफ्ना सुझाव दिएका छन् ।
नेपाली कांग्रेस वीरगंज महानगर सभापति मणिन्द्रलाल नेपालीले ट्राफिक समस्या समाधान गर्न विभिन्न स्थानमा स्काई बिज्र बनाउनु पर्ने, पछि जोडिएका वडाहरुमा सडक संजाल विस्तार गर्नुपर्ने लगायतका सुझाव दिनुभयो ।
नेकपा एमाले वीरगंज महानगर कमिटीका अध्यक्ष राजेन्द्र प्रसाद यादवले अहिले पानीको विकराल समस्या देखिएकोले यसको समाधानका लागि दीर्घकालिन उपाय खोज्न आग्रह गर्नुभयो ।
नेकपा एसका वीरगंज महानगर अध्यक्ष मनोज चौधरीले वीरगंजको लाइफलाइनको रुपमा रहेको सिर्सिया नदी सफाईलाई प्राथमिकता दिंदै नदीको राइट अफ वे छुट्याएर करिडोर निर्माण गर्न आग्रह गर्नु भयो ।
जनमत पार्टीका पर्सा संयोजक ओमप्रकाश सर्राफले स्थानीय सरकारले स्थानीय उत्पादनको पहिचान गरेर ब्राण्डिङ गर्दै आयआर्जनलाई व्यवसायिकरण बनाउने गरि बजेट व्यवस्था गर्न माग गर्नुभयो ।
महानगरले गर्ने काम परदर्शी हुनु पर्ने भन्दै उहाले जनसंख्या र भूगोलको आधारमा वडामा बजेट विनियोजन गर्न पनि सुझाव दिनुभयो ।
जसपाका नगरकमिटी अध्यक्ष इश्वरचन्द्र यादवले पानीको समस्या समाधान गर्न घरबाट निस्कने पानी सोझै नालामा नभई भूमिगत पानीको पुनर्भरणका लागि घरमा व्यवस्था मिलाउनु पर्ने सुझाव दिनुभयो ।
मेयर सिंहको अध्यक्षतामा बसेको बैठकमा सबै राजनीतिक दलका प्रतिनिधि, महानगर प्रमुखका प्रेस सल्लाहकार महेश दास, जनसम्पर्क सल्लाहकार नवराज फुयाँल लगायतको सहभागिता रहेको थियो ।

Facebook Comments Box
neelamb

ताजा अपडेट्स

सम्बन्धित खबर